liii. De meitre les nez a kai ou a port

¶La nef fer{Fol. 64, BNF_Francais_5966}mee a kais Rothomagensi rien fesante ou volente rien feire doit departir du kay por donner lieu et plache a i autre nef volente et preste a ouvrer et a laborer, ja ce soit il que le kai soit au mestre a cui la nef est. ¶Et se il avient que l’en ne l’oste ne ne la veulle l’en oster du kai desus dit simplement et debonnairement, par le contredit d’aucun au mandement des viscontes de l’eaue de Rouen par leur sergans, si comme ce a esté acoustumé a feire, et les sergans truisent aucun {Fol. 64v, BNF_Francais_5966}rebelle ou engrez qui ne veulle ce feire ou le refuse a leur commandement, lesdis sergans pueent couper la feste ou la corde de quoi ladite nef estoit fermee sus terre au kai et lessier ladite nef toute seule ou aler vagante par l’eaue, et l’autre nef meitre a kai en leu d’icele nef. ¶Et se il avient que aucun eit damage por l’occasion d’icele nef lessié aler vagante si comme il est desus dit, et que la nef desus dite perisse en quele maniere que ce soit {Fol. 65, BNF_Francais_5966}en alant vagante, les viscontes de l’eaue Rothomagensis ou leur sergans n’en sont tenus a respondre a nuli por l’occasion de tele action, mes iceus qui aront contredit é esté rebelles au commandement des viscontes de l’eaue Rothomagensis a emplir l’amenderont asdis viscontes.