xlix. De la ley que l’en apele desreine

¶La ley que l’en apele desreine en la coustume de Normendie, ja ce soit il que en pluseurs manieres por les dignites soient feites aucune fois diversites et condicions, par ii tesmoins aucune foiz ou par iii ou par iiii ou par v ou par vi ou par vii, et que il n’en i ait pas ne ne doie avoir plus de vii tesmoins a ce feire selon la coustume de Normendie. Il {Fol. 60, BNF_Francais_5966}est a savoir que se desreine soit gagié en la viscontee de l’eaue de Rouen et contre la court, que celi qui l’a gagié a feire la porra feire par la treizieme mein et a esté acoustumé a feire la en ceste maniere. C’est a savoir que les viscontes ou la justice diront a celi qui gaja la desreine ces paroles, c’est a savoir se il est garni et apparellié de feire sa lei. Et donc doit celi qui la loy doit fere respondre « oil », et puis donques sera escarié la loy a iceli qui la doit {Fol. 60v, BNF_Francais_5966}feire par la justice en ceste forme. Et doit le feiteur de la loi meitre sa mein sus le Livre et dire ces paroles qui ensieveent aprés la justice, en la forme que la justice l’ara escari : ¶« Se Dex m’ait et ces seins et touz autres, que je ne doi pas a N. l’argent que il me demande » ; ou : « je ne fis pas ce que il me meit seure ». Et puis aprés ces paroles dites, se doit il drecier de son serement et treire soi arriere. Et puis aprez li doivent estre apelés ses tesmoins qui {Fol. 61, BNF_Francais_5966}la loi li doivent aidier a feire. Et doit chascun des tesmoins estre escari et oi par soi, sa mein mise sus le Livre. Et aprés l’escariement feit de la justice, doit il respondre que il n’i sont apelez ne amenés ne corrompu, ne par priere ne par pris, ne par cortoisie ne par dons que il en atendent a avoir, et dire en ceste forme : « Si me ait Dex et ces seins et tous autres, que N. a dit voir de ce dont il a feit le serement ». Et ausi doivent touz les au{Fol. 61v, BNF_Francais_5966}tres tesmoins jurer. Es queles choses, se les tesmoins aront mué ou delessié aucune chose des paroles escariés par la justice en la maniere desus dite, celi qui ara gagié la loy ou la desreinne, autant comme contre aucun^aRépétition de aucun. autre comme contre la court, la porra feire par sixte main.