li. Des bouteilliers de la viscontee de l’eaue de Roen

¶L’en doit savoir que il doit avoir ii boutelliers en la viscontee de l’eaue de Rouen, {Fol. 62v, BNF_Francais_5966}establis et jurés por boire des vins as marchaans qui sont venus vers Rouen, desquiex vins est deue moeson au roy, por eslire le tonnel ou les tonneaus qui est deu ou qui sont deus por le chois de la moeson que le roi ou les viscontes de l’eaue de Rouen doit avoir ou doivent avoir, si comme il est desus dit hu capistre des vins. ¶Item, l’en doit savoir que nul des botelliers desus dis ne doit estre courretier ne ne doit puet. ¶Item, lesdis botelliers ne doivent {Fol. 63, BNF_Francais_5966}blasmer ne loer les vins as marchaans aprez ce qu’il en aront beu en fesant leur office. Item, il ne doivent pas boire des vins a marchaans en feisant leur office, fors de xix tonneaus. Et se il n’en i a xix, il escouvient que il soient veus d’ices boutelliers.