xxxiiii. De ce que les viscontes de l’eaue doivent recorder

¶Des contens qui estoient entre les viscontes desus dis d’une part, et i juré au meire de l’autre, por la reson de un forfeis ou de injures que ledit juré fist adis viscontes si comme lesdis viscontes disoient les forfeitures et le injure avoient esté dites en pleidant contre le juré. Le{Fol. 51, BNF_Francais_5966}dit juré ala a conseil, et le meire et les pers ovec li por conseillier lei. Et quant il revindrent du conseil, le juré dut respondre a la requeste desdis viscontes et dist ledit juré que bien responnoit et bien respondroit a la requeste des viscontes desus dis, sus laquele chose ledit juré requeroit le recort de la court. Et adonques respondirent et distrent lesdis viscontes que volentiers s’en recorderoient. Et aprez ce, respondirent et distrent a l’encontre lesdis meire et peirs Rothomagenses {Fol. 51v, BNF_Francais_5966}que il s’en devoient recorder. Et de ce se mistrent lesdis viscontes d’une part, et lesdis meire et peirs de l’autre, en arbitres. Et lesdis arbitres distrent que lesdis meire et peirs ne s’en devoient pas recorder porce que il avoient esté au conseil dudit juré, mes lesdis viscontes et ceus qui estoient ovec eus s’en recorderoient.