Ce qui appartient au sergent de la viconté

L’abbé de Saint Ouen de Rouen doit a chacun dez sergens de la viconté de l’eaue chacun an, le dymenche aprés la feste saint Ouen, i gallon de vin, ii pains, i mez de beuf et i de porc. ¶Lez maistrez de la viconté leur paient chacun an a la feste de Toussains, a la Saint Martin et a Noel, a chacune feste, a chacun sergent xx d. ¶Item, eulx doivent et {Fol. 83, BSG_2998}ont acoustumé a boire et menger a la viconté la veille de Noel a souper et le jour. ¶La veille et le jour de l’an. ¶La veille et le jour de la Typhaigne. ¶La veille et le jour de la Chandeleur. ¶Le mardi de Karesme pernant a soupper. ¶La veille de la Marchesque. ¶La veille et le jour de Pasques. ¶La veille et le jour de l’Ascencion. ¶La veille et le jour de Penthecouste. ¶La veille et le jour de la my aoust. ¶La veille et le jour de la Toussains. ¶La veille et le jour de la Saint Martin. {Fol. 83v, BSG_2998}¶Item, eulx ont acoustumé a avoir et queullir de chacun marchant i d. qui apporte ou fait apporter aucunes derrees pour vendre ; excepté bestes vives et ceulx qui sont francz de coustume, c’est assavoir au jeudi absolut, a la foire du Prey, a la foire Saint Gervais, a la foire Saint Ouen, a la foire Saint Laurens, a la foire du camp du Pardon et au jour que le desliage est queully. Et si ont avec tout ce qui est devisé en cest livre en plussieurs lieux.