Les choses et lez personnes qui sont franches. xiie chappitre

Allun de glace ne boucan ne doibt rien. Sain quant il vient avec les bacons donc il est yssu {Fol. 20v, BSG_2998}et les bacons s’acquictent, il ne doibt riens. ¶Veneson, fil en lissel, parchemin, vermeillon, cardon, braeux de fil, aguilles, toute serpilliere, coutilz, moulles, peaulx de putois, toute oeuvre de ourmerie, tout fruit porté a col, coton, craspois, couleurs, vaulde, tapis de fil et toute robe ou tout vestement a l’usage du marchant ou de sa femme, coute de bourre, huche ou buffet sans clef et on {Fol. 21, BSG_2998}les apporte a Rouen, eulx ne doibvent rien. Glu, chappeaulx de bonnet, chappeaulx de feutre, tout poisson porté a col, sain, cardons, plastre, pierre, terre a foullon, mesrien et tout bosc, gingembre, canelle, giroffle, argent et or, bresil, graine, blé et toutes autrez choses a semer, vin achaté de tonne de reec aprés la mi mars, sidre. A charecte a preste, de chevalier et de tout gentilhome, maiz que il ait esté filz ou {Fol. 21v, BSG_2998}fille de chevalier ou de dame, et de toutes leurs choses a leur usage, et clers qui sont dedens les saintes ordres, de prestre, sont francz de toute coustume en telle maniere que ilz jureront que se ilz vendent vins ou choses qui doibvent coustume ou mueson, que ilz l’aporteront en la viconté de l’eaue. Huylle d’olive et de canevis, scieu batu, toute poullaillerie come oeufz, chevriaulx, oyseaulx, fourmages et telz choses sont {Fol. 22, BSG_2998}francz de coustume, maiz qu’ilz soient portés a col. ¶Toute quinquaillerie, c’est assavoir vreteux, flageux, mireux, fiseaulx, cuillers de fust, savon et telz choses menues come que ilz soient portees, blé porté a col, corbuchon, c’est assavoir harenc sans teste qui fust pendu par la queue, selletenc, verre, toute cire qui vient avec son miel, gravelle, yvire, peaulx de mourine ne doibt rien, mez que celui qui l’aporte jure que la beste ne receust {Fol. 22v, BSG_2998}oncquez mort par le fait d’aucun. ¶Noire poix coullant, sarge roiee, meulle a fevre perchié et clou.