De mectre lez nefz aux cays de Rouen. xlviie chappitre

Se nefz ou la nef la ou l’en ne fait rien qui est fermee aux cays de Rouen ou l’en en veult riens faire, tant soit le cay a celui a qui la nef est, si donrra elle lieu a la nef apparillié a ouvrer. Et se ce ne peult estre fait si plainement ou debonnairement pour le {Fol. 52v, BSG_2998}debat d’aucun, et c’est acoustumé a estre fait par le commandement dez vicontes de l’eaue par lez sergens d’icelui lieu. Lesquieulx sergens treuvent aucun esgrés ou rebelles qui refuse a ce faire ou que il contredie, les sergens pourront desfermer la nef ou coupper la teste ou la corde de quoy celle sera fermee a terre au cay et laisser aller vaucrant toute seulle par l’eaue, et l’autre nef mectre au cay en son lieu. Et se il advenoit que {Fol. 53, BSG_2998}par l’occasion de tel fait aucun eust dommage et la nef perillast, lez vicontes de l’eaue ou leur sergens ne seront pour ce tenus a rendre riens, mais le contrediteur et rebelle l’amenderoit aux vicontes dessus dis.