Dez nefz et des coustumes que ilz doibvent et dez marchandises que ilz apportent. ixe chappitre

Quant une nef qui est faicte en Angleterre vient a Rouen, elle doibt estre despousee. Et paie pour le despouser au roy v s. et pour son siege iii s., et aux sergens x d. Et se elle a {Fol. 14, BSG_2998}esté autreffoiz despousee, elle ne doibt riens pour despouser, maiz que l’en puisse monstrer par merel ou par signe que elle ait esté autreffoiz despousee. Maiz elle paie tousjours pour son siege iii s. Et se elle apporte harenc de la coste d’Angleterre, l’en en paiera ung millier au roy. ¶Et se elle apporte harenc de la coste de Flandres, l’en paiera au roy pour chacun millier iiii d. ¶Et des autrez choses qu’elle apporte, elle ne doibt riens au roy. ¶Et se il advenoit qu’elle {Fol. 14v, BSG_2998}deschargast avant qu’elle venist a Rouen, maiz qu’elle fust entree en Saine, elle debvroit pour chacun millier iiii d. ¶De la nef qui vient de Grenesis et de Dieppe, l’en paie x d. ¶Et de la nef qui vient d’oultre Dieppe et le Mont Saint Michiel, elle doibt aux sergens x d. ¶Et se la nef vient d’entre Dieppe et le Mont Saint Michiel, elle doibt aux sergens i d. tant seullement. ¶La nef qui vient d’Illande doibt a la viconté de Rouen xx s. t. ¶Au chastel de Rouen, ung tymbre de martres {Fol. 15, BSG_2998}ou x l. t. ; premierement le serment dez marchans que ilz ne povoent trouver a vendre ledit tymbre es parties d’Illande quant la nef fu chargee. ¶Et se elle apporte ledit tymbre, lez marchans jureront que il fu achaté es parties d’Illande ; ne n’est pas a recevoir ledit tymbre. ¶Item, ladicte nef doibt au chambellenc de Tanquarville i austour ou xvi s. ; premierement le serment des marchans receu en la fourme et maniere dessus dicte. ¶Et pour ce, ledit chambeclenc {Fol. 15v, BSG_2998}est tenu a trouver merrain a rappareiller la nef se elle en a mestier, a la requeste du marignier ou du maistre de la nef. Et de celle nef l’en doibt prendre congié aux vicontes de l’eaue. ¶La cogue de Flandres ne doibt pas vendre sans le congié des vicontes de l’eaue. Et se elle vent sans le congié des vicontes, elle paiera pour l’amende iii s. Et se elle doibt acquit de ce de quoy elle apporte, elle doibt aux sergens {Fol. 16, BSG_2998}x d. Et se elle fu faicte en Angleterre, tant soit elle de Flandres, elle doit estre despousee. ¶La cogue de Frise ou de Danemarce n’est pas tenue a prendre congié. Et se elle apporte cuirs, l’en doibt pour chacun lot aux sergens v d. ¶Adecertes lez choses qui s’acquictent par compte, si come bacons et telz choses, et s’acquicteront sans lez sergens, car ilz n’en ont riens. ¶Pour chacune ancre, maiz qu’elle ne soit de la nef, l’en doit i d.