Le prologue des coustumes de la viconté de l’eaue de Rouen

Comme mon entente soit a desclairer en ceste oeuvre presente les drois et les coustumes et lez appartenances de la viconté de l’eaue de Rouen, tant come je pourray aller contre la mauvaise convoitise d’aucuns come fermiers, qui en temps advenir pourroient estre en ladicte viconté ; et que aucun ne fust esgené par eulx pour l’occasion de la peccune {Fol. 6, BSG_2998}que l’en leur paie par force et sans raison ; et que le droit et hertage au roy de France soit gardé, que eulx ne le puissent anichiller ; et que ce qui fust et deust estre ausdis fermiers leur fust rendu et païé sans nul amenisement. Je requier et appelle a ceste oeuvre ceulx qui y verront a corriger et amender, que ilz le corrigent et amendent ; et ce qui sera a ameniser et a oster, que ilz le parfaçent ; que se trop y a, que ilz en ostent ; et m’y veullent faire aide en aucune maniere.