[Le jugement sur l'infraction de la nef de Saint Wandrille]

En l’an de grace notre Seigneur mil iiic et xii, le mardi de devant la Saint Symon et Saint Jude, advint a Rouen que la nef a l’abbé de Saint Vandrille avalla le pont toute chargee de vins, laquelle et lez vins se aloient sans ce que les vins eussent esté veus dez bouteilliers de la viconté de l’eaue de Rouen. Et pour ce, ladicte nef et lez vins furent suys. Et voulloit Jehan Larchevesque, qui adonc tenoit la viconté, que eulx {Fol. 78v, BSG_2998}fussent forfais. Mais pour la prochaineté dez amis, il print amende. Et y envoya l’abbé, qui pour le temps estoit, ung de ses moignes qui estoit bailli appellé dampt Raoul dehors la ville ; lequel vint faire amende audit Jehan Larchevesque que pour le meffait dessus dit, en l’ostel et en siege de la viconté, devant grant foison de bonnes gens. De laquelle amende, Guillaume de Froville, Guillaume Le Machon et autrez furent pleiges. Et en print ledit Jehan {Fol. 79, BSG_2998}Larchevesque pour l’amende c l.