De ceulx qui ne sont pas tenus a païer sallaire aux sergens et denier pour tourtel. lve chappitre

L’en a acoustumé en la viconté de l’eaue que les sergens ne pevent demander rien pour leur service du plaintif qui aura païé les destrois pour semondre ou arrester celui contre qui il vouldra plaider en la viconté de l’eaue. {Fol. 57, BSG_2998}Mez se le plaintif veult donner aucune chose aux sergens par sa courtoisie sans contraignement, le sergent le pourra prendre come don. Et si ne doibvent lez sergens avoir le denier pour lez tonneaux qui viennent a Rouen en nef ou en batel, tant en ait le roy xvi d. pour chacun tonnel, se ainsi n’est que l’en ait apporté en nef ou en batel v tonneaulx. Et se ilz viennent de dessus Mante, l’en en paie aux sergens x d. Et se ilz viennent de dessoubz, on n’en paie que v d. pour toute la navee ou {Fol. 57v, BSG_2998}batellee. Et se ung seul tonnel voit ou vient ou passe oultre, l’en en paie aux sergens i d. Et est assavoir que se ung marchant a vins en plussieurs charectes venans a Rouen ou passans par la ville, lez sergens n’auront pour tout que ung seul denier.