Ce qui appartient aux sergens

L’abbé de Sainct Ouen de Rouen doibt a chacum des sergens de la viconté chacum an, le dimence aprés la feste sainct Ouen, ung gallon de vin, deux pains, ung més de beuf et ung més de porc. Les maistres de la viconté leur paient chacum an, chacum a la feste de Toussains, a la Sainct Martin et a Noel, a chacune feste et a chacum sergent xx d. Item, eulx doibvent et ont acoustumé a boire, a menger a la viconté la veille de Noel a soupper et le jour, a la veille et le jour de l’an, la veille et le jour de la Thiphanie, la veille et le jour de la Chandeleur, le mardi de Karesme prenant a soupper, la veille de la Marchesque et le jour, la vielle de Pasques et le jour, la veille de l’Ascention et le jour, la veille de Penthecouste et le jour, la veille de Sainct Jehan et le jour, la veille de la my aoust et le jour, la veille de la Toussains et le jour, la veille de la Sainct Martin et le jour. Item, eulx ont acoustumé a avoir et ceuillir de chacum marchant i d. qui apporte ou faict apporter aucunes darrees pour vendre, excepté bestes vives et ceulx qui sont francz de coustume, c’est ascavoir au jeudi absolut, a la foire du Pré, a la foire Sainct Gervays, a la foire Sainct Laurens, a la foire Sainct Ouen, a la foire du camp du Pardon et aux jours que le desliage est ceully. Et sy ont avec tout ce qui est devisé en ce livre en plusieurs lieux.