[Le jugement sur l'infraction de la nef de Saint Wandrille]

En l’an de grace mil ccc xii, le mardi devant la Sainct Symon Sainct Jude, avint a Rouen que la nef a l’abbé et couvent de Sainct Wandrille {Fol. 25v, BMR_Y112}avalla le pont toute chargee de vins, laquelle et les vins s’en alloient sans ce que eussent esté veuz des bouteilliers de la viconté de l’eaue de Rouen. Et pour ce, ladicte nef et les vins feurent suyvis. Et voulloit Jehan Larchevesque, qui adonc tenoit la viconté, que eulx feussent forfaictz. Mais pour la prochaineté de ces amys, il en print amende. Et envoya l’abbé, qui pour le temps estoit, ung de ces moynes qui estoit baillif appellé damp Raoul dehors la ville ; lequel vint faire amende audict Jehan Larchevesque que pour le meffaict dessus dict, en l’hostel et au siege de la viconté, devant grand foison de bonnes gens. Laquelle amende, Guillaume de Sireville, Guillaume Machon et autres feurent pleiges. Et en print ledict Jehan Larchevesque pour l’amende c l.