La franchise que les cytoiens de Rouen ont en ladicte viconté

Se aucum de la franchise de Rouen achate vins, mais qu’ilz aient creu au dessus du Pont de l’Arche, et se ilz viennent a Rouen, ilz paieront aux vicontes mueson, tant soient il a l’husage du marchant et aient creu en ses propres vignes. Et du vin qui aura {Fol. 14v, BMR_Y112}creu au dessoubz du Pont de l’Arche, ne mueson ne coustume n’en est payee. Mais se les vins croissans au dessoubz du Pont de l’Arche ont esté donnez a aucum cytoien de Rouen, mais qu’il face foy a la viconté de l’eaue que il n’en vendra riens, ilz seront quictes de toute mueson et de la coustume ; se le maire en a baillé aux vicontes de l’eaue aucum estre coustumier de iceulx vicontes par son meffaict. Et generallement tous les citoiens de Rouen sont quictes en la viconté de l’eaue de toute coustume. Et est assavoir que si le cytoien ou le juré, se le montier de la parroisse ou il demeure siet et est dedens les murs et les clostures de la ville de Rouen, il sera quicte de tourtel tant demeure il dehors de la cité.