Si comme l’en queust les estallages des penniers de la maree. Premierement

Tous ceulx qui achattent poisson fraiz ou mellenc poudré pour revendre a Rouen doivent pour chacum pennier iii d., et les rabatent a leurs marchans. Ne nul n’en est franc, ce ne sont gens d’Eglise ou de relligion ou chevaliers, bourgeoys qui en achattent pour eulx sans revendre, et ceulx qui en achattent pour confraries, pour nopces ou pour aucune feste. Se eulx il coustent, il pairont iii d. et les rabatront comme dit est. Ne nul poisson n’en est franc. S’il n’est sallé encore, paie l’en pour chacum pennier de mellenc poudré autant comme de fraiz, se il n’est achaté a compte, ou autre poisson comme macquereaulx fraiz ou harenc fraiz. Mais se il est achapté a compte, ceulx {Fol. 23, BMR_Y112}ne doivent riens. Et chacum pennier de harenc fraiz qui est acheté et il est vendu entour les halles ou entour l’aitre Sainct Michiel, l’en en doit iii d. Et se il est vendu au pont de Saine ou au pont de Robec ou aval les rues, l’en en doit rien. Et ce ung marchant apporte macquereaux frees ou sallé ou autre poisson frees en brouette pour vendre, se il le vend il paira iiii d. pour estallage. Aprez se aucum marchant qui amene poisson frees pour vendre ou faict mener, il doit pour chacune journee vi d. Et ce ilz sont deux personnes ou trois qui partent ensembles, ilz doivent pour chacum vi d. Ne nul n’en est franc. Et s’ilz s’en vont ou maynent leurs chevaulx oultre les mettes ou oultre la barriere sans païer leur estallage, leurs chevaulx seront forfaictz ou amende faicte a la voulunté.