L’office des bermens

En la cité de Rouen est une office des bermens que l’en appelle de antiquité la bergue ; lesquelz charchent les tonneaulz et les autres marchandises en l’eaue de Sayne et a terre. Et doit leur serment une foys en l’an renouveller, c’est ascavoir a la Sainct Michiel par devant les vicontes de l’eaue de Rouen de leur office. Et doit estre faict en ceste forme, c’est ascavoir que la compaignie qui est appellee bergue dira et monstrera le nombre des compaignons en la viconté de l’eaue ; de laquelle bergue le nombre n’en pourra estre creu par l’espasse d’un an. Mais se la bergue a mestier d’aucuns autres bermens, ilz les pourront appeller avec eulx pour gaigner leur journee.