De cheus qui ne sont pas tenus a païer sallere as sergans ou denier por le tourtel. lv

L’en a de coustume en la viconté de l’eaue de Rouem que le sergant de chu lieu ne puet demander rien pour son servise du plaintif qui ara païé les destrois pour semondre ou arrester cheli contre qui il voudra pledier en la viconté de l’eaue. Mes se le plaintif veut donner aucune chose par sa courtoisie sans contregnement au sergant, il le pourra prendre conme don. Et si ne doivent pas ler sergans avoir le denier {Fol. 42v, BnF_NAF_10031}des tonniaus qui viegnent a Rouem en nef ou en batel, tout en ayt le roy xvi d. de chascun tonnel de coustume, se ainsi n’est que l’en en ayt aporté v tonniaus au mains en la nef ou el batel. Lezquiex tonniaus se eus viennent dessus Maante, l’en paiera as sergans pour toute la batelee ou la navee x d. Et se il viennent de dessous Maante, l’en paiera asdis sergans pour toute la navee ou batelee v d. Et se i seul tonnel viegnen ou voist ou passe, il doit as sergans i d. Et est assavoir que s’aucun marcheant a vins {Fol. 43, BnF_NAF_10031}en pulseurs charetes venans a Rouem ou pasans parmi la ville, les sergans n’aront que i seul denier pour tout.