De metre lez nes a quay. xlvii

Les nes ou la nef fremee as quays de Rouem qui ne fet riens ou ne veut riens fere, tout soit le quay au segneur, la nef doit donner lieu a l’autre nef apparelié a ouvrer. Et se che ne puet estre fet simplement ou debonnerement pour le debat d’aucun, che a esté acoustumé estre fest au quemandement des vicontes de l’yaue par les sergans d’icheli lieu. Lesquex sergans se il treuvent aucun en{Fol. 39, BnF_NAF_10031}grés ou rebelles qui refuse a che fere ou le contredie, les sergans pourront deffermer ou decouper la feste ou la corde de quoy la nef sera fermee a terre a quay et lessier la aler vaucant toute seule par l’iaue, et l’autre nef metre a quay en son lieu. Et se il avenoit que par l’occacion de tel cas eust aucun damage et la nef vaucrante perillast, les vicontes de l’eaue ou leur sergans n’en seroient pour che tenus a riens rendre, mes le contraditeur et rebelle l’amenderoit as vicontes dessus dis.