La coustumes des iiii piés. xvi

Pour i cheval qui vient a Rouen pour estre vendu, l’en doit ii d. Est se il ist par la porte la ou il entra et il ne soit vendu, il ne doit riens. Et aussi de toutes bestes queles que eus soient est paiee toute la coustume et sont franches en la maniere que dessus est dit au revenir de la coustume. Item, pour chascun cuir tané l’en paie i d., mez que la queue y soit. Et de cuir frest aussi, tout n’y soit la queue et de combien {Fol. 20v, BnF_NAF_10031}et que l’en en port, mez qu’il ne soit detallié. Pour ic de piaus de chevriaus, iii d. ; et de aigneaus aussi. Pour i bacon de tueson, i d. Por une flique, i d. Et se il en y a ii flique ensemble mes que il soient d’une beste, i d. tant seulement. Pour la dousaine de piaus de veel a let, ii d. Pour le cuir de cheval, de buef ou de vache ou d’autre beste morte par cas d’aventure, i d. De droite mourine, riens.