De fere la loy que l’en apele desrene. xliii

La loy que l’en apele desresne par la coustume de Normendie et fete en pulseeurs manieres et pulseurs condicions, aucune fois par ii tesmoing ou par iii ou par iiii ou par v ou par vi ou par vii, et ne seurmonte point le nombre de vii tesmoins par la coustume de Normendie. Et nepourquant en la viconté de l’eaue de Rouem, se elle est gagié conrtre la court, chil qui l’a gagié le fera li tresime en cheste {Fol. 36v, BnF_NAF_10031}fourme. Ch’est assavoir que la justise dira a cheli qui a gagié la loy se il est garni et apareillié de sa loy fere. Se il dit ou^asic. « oyl », adonques li sera escarié la loy en cheste fourme, la main estendue sus le Livre, et dira aprés cheli qui tendra les plez : « Se Diex m’ayt et ches sains, l’argent que vous me demandés, je le vous doy pas » ; ou dire : « je ne fis pas che ». Et adont se doit lever du serement et departir s’en. Et dont lé autres aydans, sans apeler et sans detirer, et qui ne soient pas sourbournés ne par priere ne par pris, se doivent aprochier chascun par soy au Livre, la main {Fol. 37, BnF_NAF_10031}estendue dessus, et puis dire l’escarissement en cheste fourme : « Du serement que N. a chy juré sauf serement a juré, sy m’ayt Dex et ses sains ». Et en tel maniere tous les autres doivent jurer. Et quoy se il muent riens ne delessent des paroles qui leur sont escariés de la justise, si conme il est dessus dit, cheli qui gaja la loy ou desrene perdra. Et se aucun gage ou desrene contre aucun autre que contre la court, il la poura fere soy siste main.