[Suite du chapitre : Des choses que les personnes de sainte Yglise sont tenus païer as portes de Rouen que l’en apele les barres]

L’abbé de Fescamp doit a la porte Beauvoysine une myne de fourment par an pour aller querre les tourteaulx a Sainte Marie de Fontaines. Et doit le fermier dudit abbé faire païer les tourteaulx au barrier a ses coulx et despens. Ceux d’Estouteville doyvent par an pour le fieu d’Estouteville lx garbes de blé, xx garbes d’orge, xx garbes d’avoyne a chacune des portes ; et les doit l’en {Fol. 60v, BNF_Fr_5967}prendre a la grance monsr Jehan d’Estouteville, chevalier. Item, a la porte Cauchoise, xl garbes de blé, et sont prinses a la grance au conte d’Eu a Roumare. Et si doyvent les ffermiers ii septiers de vin en ii canes verrinees neufvees et une longue de beuf. La dame de Courcelle doit par an a la porte Cauchoise xx garbes de blé, et l’en lui doit xviii d. L’abbé de Jumeges doit par an a la porte Cauchoise ung septier de vin, viii pains, viii més de char, i quarteron de harenc, i septier d’orge et ix bachins d’avoyne qui doyvent monter ung boissel.