De la franchise que les citoiens de Rouen ont en la viconté. xl

Se aucun de la franchise de Rouen achactent vins, mes que ilz aient cru dessus le Pont de l’Arche, se ilz viennent a Rouen, il paiera aux vicontes moeson, {Fol. 36, BNF_Fr_5967}tout soient ilz a l’usage du marchant et aient creu en ses propres vignes. Et du vin qui ara creu dessoubz le Pont de l’Arche, ne moeson ne coustume n’en est païee. Mes se les vins croissans desoubz le Pont de l’Arche ont estés donnés a aucun chitoyen de Rouen, mes que il face foy en la viconté de l’eaue que il n’en vendra rien, il seront quites de coustume ; se le maire n’a baillé aucun aux vicontes de l’eaue estre coustumier desdictes vicontes par son meffet. Et gueneraument tous les citoiens {Fol. 36v, BNF_Fr_5967}de Rouen sont quites en la viconté de l’eaue de toute coustume. Et est assavoir que le citoien et le juré de Rouen, se la paroisse dont il est est assise dedens les meurs de la cité, il est quite du tourtel tout maigne il dehors les meurs de la chité.