De mettre les nefz a kay

{Fol. 40v, BNF_Fr_5967}Les nefs ou la nef fermee a kay de Rouen qui ne fait rien ou ne veult rien faire, tout soit le kay au seignier, sa nef doit donner lieu a l’aultre nef apparillee a ouvrer. Et se ce ne puet estre fait simplement ou debonnairement pour le debat d’aucun, ce a esté acoustumé estre fait au conmandement des vicontes de l’eaue par les sergens d’ichu lieu. Lesquieulx sergens se ilz treuvent aucun engrés ou rebelle qui refusse de ce faire ou le contredie, les sergens pourront deffermer ou coupper la feste ou la corde de {Fol. 41, BNF_Fr_5967}quoy la nef sera fermee a terre ou a kay et lessier la aller vaucrant toute seulle par l’eaue, et l’aultre nef mettre a kay en son lieu. Et se il avenoit que par l’ocasion de tel meffait aucun eust dommaige et la nef vaurante perillast, les vicontez de l’eaue ou leurs sergens n’en seroient pour ce tenus a riens rendre, mes le contradicteur et rebelle l’amenderoit aux vicontes dessus dis.