[La mueson et la coustume des vins]

A la viconté de l’eaue de Rouen a telle franchise que nul ne puent amener vins vers Rouen que puis que ilz sont passés Carretage que ilz ne doyvent leur moeson. Et se ilz demeurent oultre Carretage jusques a la basse Sentelle emprés les meurs de Bonport, cil qui est {Fol. 51v, BNF_Fr_5967}pour la viconté a Eullebeuf le puent arrester jusques a tant qu’il soit païé de la moeson pour la viconté. Et a l’en de coustume a païer de chacun tonnel ii s. vi d. t., et pour chacune queue xv d. ; excepté ceulx de la ville du Port Saint Oen qui ne doyvent que ii s. pour tonnel et xii d. pour queue des vins qui sont deschargiers en ladicte ville, des tonneaulx qui demeurent as villoys. Et se ilz passoient en carette et ilz estoient menés en lieu que ilz fussent chargiez entre Rouen et Caudebec pour aller contreval oultre Caudebec, {Fol. 52, BNF_Fr_5967}ilz paieront autretant moeson et coustume come se ilz deschendoient a Rouen ; et la coustume seroit pour homme coustumier.