[L'arret de l'Echiquier sur le defaut de bourrel]

Il avint a Rouen a l’Esequier a la Saint Michiel qui fu l’an de grace mil iiic et xii que il ont gens jugiés a pendre et fu le bourrel mort. Et ne peult l’en trouver qui l’office de la mort d’iceulx vousist faire. Et voult Pierres de Hanget, qui adonc estoit baillif de Rouen, que les sergens de la viconté de l’eaue le feissent et disoient que eulx le devoyent faire. Et les sergens disoient tousjours que eulx n’y estoient point tenus et que {Fol. 58, BNF_Fr_5967}eulx, ne leurs ansseseurs ne le firent oncques, ne eulx ne le feroient ja, se Dieu plaist, car eulx sont sergens du roy et ont leur servise de don de roy et par lettres esquelles il n’est pas contenu que eulx le doyvent faire. Et cest debat durant, Pierre de Hangest, qui adonc estoit baillif, de en fist aprise par Jaques du Chastel, adonc le maire de Rouen, par Robert son frere, par Vincent Michiel et par aultres bourgois de Rouen. Et aprez ce fait et enquis, respondu par l’evesque d’Auserre, par maistre Philippe Le Convers, par sire Regnault {Fol. 58v, BNF_Fr_5967}Barbou, par maistre Pierre de Latilli et aultres maistres de l’Eschiquier adoncques, que lesdis sergens ne devoient mye faire l’office, ne n’avoient oncques fait. Mes se ainsy estoit que l’en eust deffaulte de bourel et que l’en ne peust trouver qui ladicte office feist, lesdis sergens de la viconté de l’eaue deveroient querre qui le feroit aux coulx et aux despens le roy, comment que eulx l’alassent loings querre.