[D’une plainte d’un coustumier contre un autre coustumier]

Se c’est chose que ung home coustumier se plaigne d’aultre et se plaigne {Fol. 53, BNF_Fr_5967}que il lui doye deniers, l’omme qui se clamera paiera de chacun xii d. i d. de destrois. Selon la somme que il demandera, de ii s. ii d., de x s. x d., et de xx s. xx d., et de c s. c d. Et se il en enchiet en amende de sa clamour, il ne paiera aultre amende que les destrois. Se c’est chose que cellui de qui l’en se clame congnoise que il doye, le viconte tendra l’arrest jusques a tant qu’il soit païé. Et se il nye que il ne lui doye riens, il en gaigera une loy et si sera mis d’un jour a aultre pour faire hatif droit ou par gage de bataile, et seront mis les jours de jour {Fol. 53v, BNF_Fr_5967}a aultre. Et a le viconte sa bataille tous les jours de l’an, en Karesme et dehors, et ses loys autressy en Karesme et dehors. Et se la bataille n’y puet estre, l’enqueste y sera si come le roy l’a commandé nouvellement.