{Fol. 8}Item, il fut trouvé que le prevost du Pont l'Evesque en la baronnie de Montfort en tant que, touche les coustumes et usages de la dicte prevosté sestent es fieux, franchises, coustumes et acquis, en la maniere qui ensuyt.
Premierement.

Il a et doibt aver a ladicte ville du Pont l’Evesque troys foires dont les deulx syeent entre les cours des rivieres en un camp nommé le Camp de la foire. La premiere, le jour Saint Michiel, en septembre ; la seconde, le jour de la Saint Martin de ysver, dont la declaration des acquis, coustumes, et franchises dycelles deulx foires sont dictes cy apprés ; la tierce, qui est nommee la Foire au voleur, est une assemblee de gens a poyer les coustumes et acquis d’ycelle prevosté et n’est pas foire ou l’on vende ne achaite aucunes marchandises, laquelle sieet le jeudi prouchain d’aprés la Penthecouste ainsy que cy apprés sera dit plus aplain.

Cy ensuit, par declaration, les fiefz nobles qui sont tenus de venir ou d'envoyer leurs prevostz faire leur debvoir a la dicte Foire au voleur sur paine d'amende, en la maniere qui ensuyt.

Premierement.

{Fol. 8v.}Le fief Johan d’Asnieres, a Pierreficte ;
Le fief Guillaume de Betteville, au Pont l’Evesque ;
Le fief Ricart Fourmage, a Surville ;
Le fief au prieur de Saint Ymer, audit lieu ;
Le fief Johan Goulaffre, a Saint Ymer ;
Le fief Johan de Silly, a Pierrefite ;
Le fief Robin Caperon, a Pierrefite ;
Le fief Gieffrey Leboutiller, a Pierrefite ;
Le fief Daubigny, a Saint Ymer ;
Le fief Ymer Alain, a Saint Ymer, lequel fief tiennent a present le seigneur de Gerros et Thomas le Brun.

Lesquieulx fiefz dessus nommés et les hommes resseans d'yceulx sont francz de toultes coustumes deubz a cause de ladicte prevosté et de toultes choses par eulx achactés, de vendre a ladicte prevosté, excepté tant seullement que se ilz vendoient en detail au couvert des halles du Pont l’Evesque, ilz poyeront chacune personne i d. pour le couvert desdictes halles avecques leur estal, et a cause de ce les prevosts desdis fiefz sont tenus venir soy presenter a ladicte Foire au voleur, par chacun an, devant le prevost de ladicte prevosté du Pont l’Evesque, et luy baillier chacun leur verge et aussy rapporter par leur serment se es fiefz de leursdis seigneurs, ilz sçavent aucune chose appartenant au roy, notre sire, a cause de la prevosté du Pont l’Evesque, et en espetial, se il y a aucun qui aient fait aucunes ventes de desrees ou marchandises qui aient esté portees hors de ladicte baronnie du Pont l’Evesque, dont ceulx qui ont fait lesdictes ventes n’en aient retenues {Fol. 9}les coustumes deubz a ladicte prevosté, et se ilz dient qu’ilz en aient aucuns qui ne les aient point retenues, les doibvent bailliez par escript, et nommer et desclarer les personnes et les desrees. Et de ce qu’ilz desclareront, leur seigneur en aura les amendes : pour chacun denier, xviii s. ; et se ilz dient qu’ilz n’en sçavient nulz en leurs fiefz qui n’aient fait leur debvoir et poyé leurs coustumes, le prevost de ladicte prevosté du Pont l’Evesque doibt enquerir s’il y a aucuns aultres que les prevotz d'yceulx fiefz ne luy aient nommé qui n’aient fait leur, de retenir la coustume des ventes que aura faicte yceluy prevost du Pont l’Evesque, audit cas en aura les coustumes et les amendes sur ceulx qui n’airont fait ladicte retenue.

Item

Il est trouvé que le prevost de ladicte prevosté^dprevosté écrit en interligne. du Pont l’Evesque a eu et doibt avoir tous les xiiiemes et reliefz des ventes des heritages du fieu au Jumel et de tous aultres fiefz et tenement tenus de ladicte prevosté, a cause de la baronnie de Monfort, hors le bourgaige du Pont l’Evesque.

Item

Est trouvé que chacun qui achacte rente, place ou heritage audit bourgaige doibt de coustume pour chacun achat, audit presvot, iv d., et luy estre bailliés et poyés au jeudi de la Foire au voleur ; et se ilz ne le paient, ilz doibvent l’amende comme dessus, de chacun denier, xviii s. et pour ce, ne sont tenus paier audit bourgaige aucun relief, ne xiiime, comme ilz dient.

Item

Est trouvé que chacun lundi il y a marchié au Pont l’Evesque, auquel jour chacun marchant de quelque marchandise qu’il soit, demourant ou resident hors dudit bourgaige du Pont l’Evesque et desdis fiefz devant dis, et les tenans resseans de ladicte prevosté, qui apportent et vendent a ladicte ville du Pont l’Evesque aucunes marchandises, doibvent poyer au prevost du lieu, pour chacun lundi qu’ilz y apporteront marchandise a cheval et les vendront illec ou mestront a estal, ii d. de coustume, et semblablement pour chacune foire de Saint Michiel et de Saint Martin d’ysver ; et se ilz y vendent a aultre jour que au lundi ou a jour de foire, ilz doivent audit presvot, i d. pour chacune autre fois. Et ceulx qui y apportent marchandises a cool, et illec les vendent ou estallent, doivent pour chacun lundi ou foire, i d. ; et se c’est a aultre jour que au lundi ou au jour de foire, ilz doibvent ob. ; et si doibvent poier leursdictes coustumes audit presvot, avant qu’ilz partent de ladicte ville du Pont l’Evesque, sur paine de forffaicture, laquelle appartient audit prevost.
Et en la juridiction et le bris de marchié et au cas qu’ilz seront a aucuns des estaulx des halles du roy audit lieu du Pont l’Evesque, ilz doibvent poyer pour le estal le pris qu’ilz le loeront dudit prevost, et s’il avoit aucun debat de bris de marchié, de coustumes non poyés, forfaictures ou amendes, le prevost en a congnoissance et doibt avoir un senescal pour en tenir la juridiction qui resortist devant le viconte, et dudit bris de marchié, ledit prevost doibt avoir lx s., i d.

{Fol. 9v.}Item

Est trouvé que chacun marchant bouchier du bourgaige du Pont l’Evesque doibt, pour chacune sepmaine, ii d. de coustume ; et chacun boulengier ou regrattier de oefz ou de fourmage ou d’aultres marchandises doibvent, pour chacune sepmaine, i d., et doibvent poyer au prevost ycelles coustumes, pour toulte l’annee, le jour de la Foire au voleur qui siet le jeudi prouchain apprés Penthecouste ainssy que dessus est dit, et s’ilz ne le paient audit jour, ilz doivent audit prevost du Pont l’Evesque pour chacun denier, xviii s. t. d’amende. Et pour ce, ont yceulx bouchiers et boulengiers et aultres marchans, estal au couvert des halles dudit lieu du Pont l’Evesque, toultefois qu’ilz leur plaist ; et quant est des aultres bouchiers, boulengiers ou regratiers de dehors ladicte ville du Pont l’Evesque, ilz loent leurs places et estaulx esdictes halles, a la voulenté dudit prevost, et l’en paient ou sont tenus paier avecques ladicte coustume de ii d. chacun lundi sur paine de la forfaicture.

Item

Il est trouvé que chacune personne demourant au bourgaige du Pont l’Evesque seullement, vendant vin, sydre, cervoise, ou aultre bevrage hors les places estalieres, et ceulx qui doibvent le paivre et lampraye, doibvent pour chacun tonnel ou queue ou rondelle, iv d. t. audit prevost ; se il y a sydre en tonne, pour chacun tonnel, iv d., et doibvent estre paiés audit prevost le jeudi prouchain apprés la Penthecouste, nommé la Foire au voleur ; et s’ilz ne les paient apprés le cry fait, sur ce, ilz doibvent l’amende comme dessus, pour chacun denier, xviii s.

Item

A esté trouvé que chacun marchant demourant audit bourgaige, hors des places estallieres et celles qui font le paivre et lampraye, doibvent chacun ii d. pour foire, a payer au prevost du Pont l’Evesque le dimanche d’apprés la Saint Martin d’ysver, et ii d. t. pour foire, a paier le dimenche apprés la Saint Nicholas d’ysver pour leurs coustumes des foires qui sient l’une le jour apprés la Saint Michiel en septembre et l’aultre, le jour de la Saint Martin d’ysver ; et est assavoir que se aucunes d’ycelles foires eschient au jour de lundi, le prevost prent sur chacun marchant de dehors de ladicte baronnie de Monfort vendant illec ses desrayes, double coustume.

Item

A esté trouvé que toute la juridicion et justice haulte, basse et moyenne de ladicte ville du Pont l’Evesque, appartient au roy, nostre sire, et a ses officiers et non a aultres, et que nulles personnes, gens d’église, nobles n’en pevent ou doivent avoir siege ou juridicion temporelle en ycelle ville du Pont l’Evesque.

Item

A esté trouvé par la desposition des dessus dits que il y a xiiii places estallieres audit lieu du Pont l’Evesque, dont les tenans de chacune place peult faire a deulx foires de Saint Martin et de Saint Martin d’isver ou Camp de la foire son estal, apprés ce que le prevost aura fait son estal primerain, et doibvent a cause d’yceulx estaux, pour l’an, chacun xiiii d. tant pour leur place que pour leur estal, qui doibvent estre poyés au prevost le dimenche apprés la Saint Nicholas d’ysver et doibt estre crié par le parquier du roy au Pont l’Evesque qu’ilz voisent paier audit prevost ce qu’ilz doibvent audit jour ; et s’ilz ne vont paier audit jour, ilz doibvent chacun ledit jour passé, audit prevost, pour chacun denier non poyé, xviii s. ; et a cause de ce, dient estre francz et quictes de toultes coustumes de vendre, et d’achacter en ladicte ville du Pont l’Evesque, sauf ce qu’ilz dient que s’ilz sient au couvert des halles, ilz doibvent chacune foys que ilz sient i d. pour le couvert.

{Fol. 10}Item

A esté trouvé que de toutes les places du Pont l’Evesque, excepté les dessus nommés estallieres et ceulx qui doibvent le poivre et la lampraye, doibvent chacune place a ladicte prevosté iv d. de rente, nommée gablages, a payer audit prevost, moictié le dimenche apprés la Saint Martin d’ysver et l’aultre moictié apprés la Saint Nicholas d’ysver prochaine ensuivant ; et se ilz ne le paient a yceulx dimenches apprés ce qu’il aura esté crié par ledit parquier, ilz doibvent d’amende xviii s. pour chacun denier ; et avecques ce sont tenus tous les tenans de toutes les places qui sont detenues, en cas de crisme, venans du chastel de Touque ou de aillieurs jusques a la prison du Pont l’Evesque et auxi d’aller convoyer les personnes qui sont condampnés et jugiés a estre excecutés jusqu’a la justice d’ycelle ville, garnis de telles armes comme ilz leur appartiennent, toutefois que il leur est signifié et fait asçavoir par le parquier du Pont l’Evesque et se dient estre francs d’aller a toutes veulz hors du bourgaige, desquelles places et masures dudit bourgaige, les parties ensuivent¹Commentaire
Comme indiqué dans la notice, la suite du cueilloir n'est pas éditiée.