Premierement.

Toutes nefz, vaisseaulx qui viennent de la mer, le maistre doict venir acompaigné de deux de ses marriniers devers le prevost et doyt faire serment se il a trouvé aucune chose en la mer qui vaille v s. et au dessus. Et se il ne vient dedict tierce maree devers le prevost, il doyt l'amende qui monte xviii s. t. Et se il ne vient acompagné de deux de ses marriniers comme dict est, il doyt {Fol. 18v}semblablement l'amende pourveu qu'il ayt quatre hommes et au dessus en ladicte nef ou vaissel.

Item, s'il a trouvé en la mer aucune chose soient vins, autrez cables, coffres ou autres choses, il les doyt apporter audict prevost et icellui prevost les doit garder par ung an et par ung jour. Et se dedens l'an et le jour, il ne vient aucun a qui icelles choses soient, lesdicts trouveur en doiyt avoir la moictié et ledict prevost l'autre moictyé. Et s'aucune chose avoient trouvé qu'ilz n'apportassent a congnoissance et depuis ilz en fussent actains, ilz en perdroient leur part et paieroit le maistre et les deux marriniers, chacun xviii s. d'amende et i d. t.

Item, s'il advenoit que aucuns maistres de nefz ou vaisseaulx eussent trouvé aucune chose en la mer comme pelleterye, vins ou autrez choses qui ne se peussent garder, icellui prevost les doyt vendre par criees et par encheres au plus offrant prouffictablement qu'il pourra, et en doyt garder l'argent et les mercques jusquez a l'an et jour acompli, comme dict est, et ne doyt icelles mercques monstrer a aucun se il ne veult icelles marchandises et derrés sieure^aLa transcription de ce mot est incertaine. pour siennes.

{Fol. 19}Item, se aucun trouve aucune marchandise en varesc qui ne soit trouvee en plain de la mer, le trouveur en doit avoir sallaire suffisant et les derees doivent^bRépétition de doivent lors du passage à la ligne. estre renduees a cellui qui les pourra prouver pour siennes. Et en cas qu'il ne vendroit aucun a qui icelles choses seroient, ilz doivent demourer acquises au prevost.

Item, se une nef vient chargee de vins, de harens ou autrez choses et elle deschargoit es mectes de ladicte prevosté, le marchant qui iceulx vins, harens ou autrez choses feroit descharger pour mener hors des mectes de ladicte prevosté paiera iiii d. t. pour piece autant de la pipe, poinçon, du baril, du demi baril, du callequyn, de la fillecte ou du demy callaquin comme du tonnel, soit le tonnel, la piece, le poinçon, le baril, le demy baril, la fillecte, le callquin, le demi callequin, plain ou wit, pour tant qu'il y ayt deux fons ; et se il n'a que ung fons, il ne doyt que ii d. t.

Item, se aucun marchant faisoit partir ung vassel des mectes qui eust chargé en icelles mectes aucunes marchandises sans acquicter, ledict prevost peult sieuvre {Fol. 19v}ou faire sieuvre ledict vaissel ou la marchandise et les faire restablir es mectes de ladicte prevosté et ledict vaissel et marchandise restablir. Et ledict prevost peult et doyt prendre xviii s. i d. t. d'amende sur chacun marchant qui aura marchandise oudict vaissel oultre qu'ilz devroient de coustume.

Le vaissel ou nef ou il a xii maquereaulx frés ou plus admenés de la mer par le pescheur qui entre es mectes et destroictz de ladicte prevosté, pour tant qu'il habite a terre, de la quille ou qu'il mecte l'ancre hors, quelqu'il soit doit de coustume xi macquereaux telz comme ilz sont oudict vaissel sans choix et doivent estre apportez en l'hostel dudict prevost par le maistre d'icellui vaissel ou autre de par lui par son commandement et se ainsi n'est faict, il doyt l'amende. C'est assavoir les forains, xviii s. i d. t. et ceulx de la ville, iii s. t. avecques la coustume sans forfaicture.

Item, se ledict vaissel estoit tout chargé de macquereaulx, se n'en devroit il avoir que xi de coustume. {Fol. 20}Et aussi se moins y en avoit que les xi, il ne devoit poinct de coustume a ladicte prevosté. Et s'il advenoit que lesdicts macquereaulx veinssent a frait en la main ou non et aux perilz des marchans qui les auroient achaptés depuis qu'ilz seroient peschez par les mariniés, en icellui cas ne doivent riens.

Le vaissel ou nef ou il a harenc frectz, s'il habite a terre comme dict est, doit de coustume au prevost ung cent de harenc. C'est assavoir six vingtz pour cent tel comme il vient, sans choix, se il est admené par les pescheurs, et le doit le maistre du vaissel ou de par lui apporter en l'hostel dudict prevost. Et se mains en n'a oudict vaissel d'un cent, il ne doit poinct de coustume. Et s'il en estoit chargé, si n'en deveroit il que ung cent. Et se ledict maistre dudict vaissel vent aucuns d'iceulx harens, ainchois que acquictés soient, le maistre dudict vaissel doit l'amende.

Et se ledict vaissel vient a fraict ou non des marchans qui l'aient achapté des pescheurs, cy comme est contenu cy devant a l'endroict des maquereaulx, il en icellui cas ne doit riens.

{Fol. 20v}Le vaissel ou nef ou il y a oistres en escalle admenés par les pescheurs qui les auroient peschez, se le vaissel ou nef habite a terre, comme dit est a l'endroict des maquereaulx, doit ung cent de oistres, c'est assavoir vixx.

Item, se aucun pescheoit ou trouveoit en a mer ung esturgon, il le doit au prevost et pour son sallaire doit avoir v s. t.

Item, se aucun treuve en la mer ou varesc aucun autre poisson comme marsouyn ou saulmon, il le doyt apporter au prevost et en doyt avoir la moictié et le prevost l'autre. Et se il ne l'apporte, il en pert sa part et se doit amende.

De tout poisson frestz, quelqu'il soit, admené par le pescheur en son vaissel, le prevost en pourra prendre, se il luy plaist, le tiers de toute la batellee au prix qu'il sera vendu par baillant erees suffisant. Et s'il vient a fraict en la main d'un marchant comme dit est, le prevost n'en pourra riens avoir.

De tout poisson admené par le pescheur en son vaissel, ledict pescheur en doit et peult {Fol. 21}prendre les deux meilleurs poissons, et le prevost tout le meilleur aprés, a son choix, pour la coustume de toute la batellee, ou cas qu'il le mectroict hors du vaissel, et se en peult prendre ledict prevost le tiers de tout le demourant, s'il lui plaist, pour le prix qu'il sera vendu, par baillant erees audict pescheur suffisant comme dict est cy devant, sans ce que ledit pescheur le puisse ou doyt contredire.

Item, ledict prevost peult et doyt prendre au droict de l'eaue appartenant a ladicte prevosté, sur chacun parc, guidee, rees ou cordes, ou il a seq poisson, en toutes les mectes de ladicte prevosté, le poisson qui est pesché par une maree, a prendre icelle maree en chacune sepmaine une foys a tel jour comme il plaira audict prevost, hors le lundi. Et doit ledict prevost faire sçavoir audict pescheur le jour dont il vouldra avoir lendemain le poisson qui y sera pesché.

Et assavoir que se aucun est^cCe début de phrase est répété. ou se dict franc qui tient aucunes marchandises dessus mectes en compaignye d'autres qui ne soit franc, il en ce cas pert sa franchise avecquez l'amende.

{Fol. 21v}Item, nul, de quelque est mestier ou estat qu'il soit, ne doyt avoir poix ne ballences en sa garde plus de ung quarteron qui monte xxv livres pesant, se ce n'est du congé et licence du prevost, et que icelui quarteron par menues parties ensemble soit adjousté au poix de ladicte prevosté chacun an pour l'appetissement, empirement ou fraudes qui y pourroient estre. Et se plus en a que ledict quarteron, le viconte de Monstievillier l'en pourra faire approcher pour l'amende, s'il luy plaist. Et se aucun a poix ou ballences adjoustés au poix de ladicte viconté, il doit au prevost double coustume. C'est assavoir, pour luy et pour son marchant, se il ou l'un d'eux ne sont francz, comme dict est, pour ce que icellui prevost ou de par lui ne pourroient tousjours estre ad ce, que ainsi seroit couvertement pesé es hostelz des marchans, espiciers et autres.

Item, le poix ou ballences de ladicte prevosté ne doit estre transporté hors de l'hostel dudict prevost, pour quelque personne que ce soit, se ce n'est de son bon gré et volonté, sauf que quant les marchans de ladicte ville auront marchandé l'un {Fol. 22}avecques l'autre grant quantité de marchandise pesant, le prevost leur pourra bien bailler le poix pour paier la coustume au roy, se ilz ou l'un d'eux ne sont francz, comme dict est. Se icellui prevost advise que ce face prejudice au roy ou aux autrez marchans qui semblablement ont a peser de leurs marchandises a plusieurs menues parties, et aussi avecques ce riens ne doict estre pesé par le peseur juré ne autre que ledict prevost ou de par luy ny soit present ou appellé.